Hum-par tumhaari chaah kaa ilzaam hi to hai

Hum-par tumhaari chaah kaa ilzaam hi to hai,

 Dushnaam to nahiN hai ye ikaraam hi to hai..

Karate haiN jis pe taa'N, koi jurm to nahiN,,

 Shauq-e-fuzool-o-ulfat-e-nakaam hi to hai

          [taa'n=satire]

Dil muddai ke harf-e-malaamat se shaad hai

 Aiye jaan-e-jaaN ye harf teraa naam hi to hai

  [harf-e-malaamat=word of criticism]

Dil na-ummeed to nahiN, na-kaam hi to hai

 Lambii hai Gham ki shaam, magar shaam hi to hai

Dast-e-falak meiN, gardish-e-taqadeer to nahiN

 Dast-e-falak meiN, gardish-e-ayyaam hii to hai

Aakhir to ek roz karegi nazar wafaa

 Wo yaar-e-khush-khasaal sar-e-baam hi to hai

  [Khush_Khasaal=virtuous]

Bheegi hai raat 'Faiz' Gazal ibtidaa karo

 Waqt-e-sarod dard kaa hungaam hi to hai.