MaiN khayaal hooN kisi aur ka mujhe sochta koi aur hai
Sar-e-aaina mera aks hai pas-e-aaina koi aur hai,
MaiN kisi ke dast-e-talab mein hun to kisi ke harf-e-dua meiN hooN
MaiN naseeb hun kisi aur ka mujhe maangta koi aur hai,
Kabhi laut aayeiN to na poochhna sirf dekhna bade ghaur se
JinheiN raaste meiN khabar hui ki ye raastaa koi aur hai,
Ajab aitbaar-o-be-aitbaari ke darmiyaaN hai zindagi
MaiN qariib hooN kisi aur ke mujhe jaantaa koi aur hai ,
Wahi munsifon ki rivaayateiN wahi faisloN ki ibaarateiN
Mera jurm to koi aur tha par meri sazaa koi aur hai,
Teri roshni meri khaddo-khaal se mukhtalif to nahiN magar
Tu qariib aa tujhe dekh looN tu wahi hai yaa koi aur hai,
Jo meri riyaazat-e-niim-shab ko “Saleem” subah na mil saki
To phir iske maani to ye huye ke yahaaN khudaa koi aur hai.
Mehdi Hasan
No comments:
Post a Comment