Khulegi is nazar pe chashm-e-tar aahistaa aahistaa,
Kia jaataa hai paanii meiN safar aahistaa aahistaa,
Koi zanjeer phir waapas waheeN par le ke aati hai,
Kathin ho raah to chhut-taa hai ghar aahistaa aahistaa,
Badal denaa hai rastaa ya kahiN par baith jaanaa hai,
Ki Thaktaa jaa raha hai humsafar aahistaa aahistaa,
Khalish ke saath is dilse na meri jaaN nikal jaaye,
KhiNhe teer-e-shanasaai magar aahistaa aahistaa,
Huaa hai sar-kashi meiN phool ka apna ziyaaN, dekha,
So jhukataa jaa rahaa hai ab ye sar aahistaa aahistaa,
Meri sholaa-mizaaji ko wo jungal kaise raas aaye,
Hawaa bhi saaNs leti ho jidhar aahistaa aahistaa..
♥♥♥
No comments:
Post a Comment