Sochta HooN Ke Use Neend Bhi Aati Hogi
Ya Meri Tarah Faqat Ashk Bahati Hogi
Wo Meri Shakl Mera Naam Bhulane Wali
Apni Tasweer Se Kya Aankh Milaati Hogi ?
Is ZameeN Pe Bhi Hai Sailaab Mere AshkoN Se
Mere Maatam Ki Sada Arsh Hilaati Hogi
Shaam Hote Hi Wo Chaukhat Pe Jala Kar ShammeiN
Apni PalkoN Pe Kaii Khwaab Sulaati Hogi
Us Ne Silwaa Bhi Liye Honge Siyah Rang Libaas
Ab Moharram Ki Tarah Eid Manaati Hogi
Hoti Hogi Mere Bose Ki Talab MeiN Pagal
Jab Bhi ZulfoN MeiN Koii Phool Sajaati Hogi
Mere Taareek Zamaano Se Nikalne Wali
Roshni Tujh Ko Meri Yaad Dilati Hogi
Dil Ki Masoom RageiN Khud Hi Sulagti Hongi
JooN Hi Tasweer Ka Kona Wo Jalaati Hogi
Roop De Kar Mujhe Us MeiN Kisi Shehzade Ka
Apne BachchoN Ko Kahani Wo Sunati Hogi.
No comments:
Post a Comment