Wo chandni ka badan khushbuoN ka saaya hai...

Wo chandni ka badan khushbuoN ka saaya hai
Bahut aziz hameiN hai magar paraya hai

 

Utar bhi aao kabhi aasman ke zeene se
TumheiN khuda ne humare liye banaya hai

 

KahaaN se aai ye khushboo ye ghar ki khusboo hai
Is ajnabi ke andhere meiN kaun aaya hai

 

Mehak rahi hai zamiN chandni ke phooloN se
Khuda kisi ki mouhabbat pe muskuraya hai

 

Use kisi ki muhabbat ka ayetbar nahiN
Use zamane ne shayad bahut sataya hai

 

Tamaam umar mera dam uske dhueiN se ghuta
Wo ek chiragh tha maine use bujhaya hai

 

                                                              Bashir Badr